Jak pomagamy?

Об’єднання лемків провадило збірку фінансових коштів для сиріт Юлії і Миколая Бочнєвичів — молодих лемків з села Переможне. Село Переможне під Луганьском — єден з найбільших лемківских осередків в тім реґіоні – било цілковито знищене в серпни і заняте през проросийски сили, котри до місцевой людности застосували репресії. На подвір’ю їх власного будинку сепаратисти розстріляли родичів Юлі і Миколая. Они здолали врятуватися і втечи, тепер жиют во Львові.

На наше проханя одозвалось дуже люди доброй воли. 4 квітня голова ОЛ Еміль Гойсак і одповідальна за збірку Вікторія Гойсак особисті спіткалися во Львові з Миколайом Бочнєвичом і переказали му гроши, котри вплинули на рахунок Об’єднання лемків до дня 2 квітня. Била то сума 2350 зл., посвідчену в umowie darowizny.

Миколай оповів нам о гісторії свойой родини. Їх рід виводится зо Ставиши, о тім селі Миколай дуже знає, хоц нигда там не бив, зберігат документи свого діда. В 1946 р. його дідів переселили на Луганщину, де родина мешкала до трагічного серпня 2014 р. Мешкали в Переможнім, практичні в самим місті Луганьску. Родиче мали свої шклярні, займувалися рослинництвом. Миколай закінчив в Луганьску коледж, спеціальніст комп’ютерни технології. Його сестра Юлія скінчила 1 рік студій в Луганьску. Тепер продовжат навчання на Львівскій політехніці. Миколай на разі не має можливости продовжати навчаня, хоче найти в міру сталу роботу, бесідує, же підоймеся вшиткого, хтів би працювати в Польщи.

Разом з нима до Львова виїхали тіж інчи родини з Переможного. Тримаются разом. До подій минулого рока не хоче вертати, тото вшитко іщи за барз свіже, за барз болит. Його родина била в т.зв. «чорних списках».

Бесідує, же в таких ситуаціях познаєся правдивих приятелів, там юж приятелів не є, то юж чужи люде. Там рядит тот, хто має карабін. Під Луганьском остала бабця, старши люде не сут скори до виїздів, а не завше і є можливіст, непокоїтся о ню.

Сердечні дякуєме вшитким жертводавцям, Спаси Боже за Ваше велике серце, небайдуже до чужого горя.

Нижше список жертводавців:

• Марія Чергоняк (Горлиці) — 100 зл.
• Богдан Баюс (Маластів) — 20 зл.
• Теодора і Петро Гойсак (Маластів) — 50 зл.
• Андрій Сокач (Горлиці) — 100 зл.
• Рената Шлянта (Лося) — 200 зл.
• Іван Пупчик (Горлиці) — 400 зл.
• Ольга і Ярослав Хом’як (Горлиці) — 100 зл.
• Андрий Скрипак (Горлиці) — 50 зл.
• Анна Косовска-Бреян (Лігниця) — 100 зл.
• Ольга Пиж (Маластів) — 30 зл.
• Кристина Малецка (Лося) — 100 зл.
• Штефан Клапик (Лося) — 100 зл.
• Роман Дошна (Лося) — 100 зл.
• Парафія Православна Святой Трійці (Горлиці) — 1000 зл.

вплати по 2 квітня:

• Михал Шафран і анонімни жертводавці (Зелена Гора) — 2000 зл. (гроши будут переказани при наступним спітканю з Миколайом і Юлійом).

Збірку коштів зме закінчили.